jauhar nahin hamare hain sayyad par khule
le kar qafas ko ud gae rakkha jo par khule
shishe sharab ke rahen athon pahar khule
aisa ghire ki phir na kabhi abr-e-tar khule
kuchh to hamen haqiqat-e-shams-o-qamar khule
kis kaj-kulah ke ishq men phirte hain sar khule
insaf ko hain dida-e-ahl-e-nazar khule
parda utha ki parda-e-shams-o-qamar khule
rangrez ki dukan men bhare huun hazar rang
turra vo hai jo yaar ki dastar par khule
kya chiiz hai ibarat-e-rangin men sharh-e-shauq
khat ki tarah tabiat-e-basta agar khule
jo chahen yaar se kahin aghyar gham nahin
khvaja ko hain ghulam ke aib-o-hunar khule
haivan par aadmi ko sharaf nutq se hua
shukr-e-khuda kare jo zaban-e-bashar khule
yusuf ki ik dukan men na tu ne talash ki
bazar kaun kaun se ai be-khabar khule
shirin-dahan se tere taajjub hai guftugu
eajaz hai agar girah-e-naishakar khule
kat jaae vo zaban na ho jis se dua-e-khair
phute vo aankh jo ki na vaqt-e-sahar khule
kotah hai is qadar mire qad par rida-e-aish
dhankun jo paanv ko to yaqin hai ki sar khule
qatil jaza-e-khair mile teri tegh ko
zakhmon ke munh khule nahin jannat ke dar khule
fasl-e-bahar aai hai chalta hai daur-e-jam
mugh ki dukan shaam khule ya sahar khule
pa-posh ham ne maari hai dastar-o-taj par
sauda-e-zulf-e-yar men rahte hain sar khule
kaif-e-sharab-e-nab ka anjam ho ba-khair
shalvar-band saqi-e-rashk-e-qamar khule
na-khvanda sharh-e-shauq jalae gae khutut
bandhe gae vo jo ki mire nama-bar khule
chahe safa tu saath taharat ke zikr kar
parhez kar to tujh ko dava ka asar khule
hans kar dikhae daant jo ham ko to kya hua
le lijiye jo qimat-e-silk-e-guhar khule
kahta huun raz-e-ishq magar saath shart ke
kanon hi tak rahe na zaban ko khabar khule
mushtaq bandishon ke hain khvabon ko chahiye
bandhvaen shaeron se jo un ki kamar khule
rukti na us se chot na chalti ye qatila
hathon se tere jauhar-e-tegh-o-sipar khule
matlab na sarnavisht ka samjha tu shukr kar
divana ho jo hal-e-qaza-o-qadar khule
chalna padega yaar ki khidmat men sar ke bal
samjhe ho kya jo baithe ho ‘atish’ kamar khule
Leave a Reply