dil ke qirtas pe ik lafz mohabbat likhna
jo kabhi ishq men ki thi vo riyazat likhna
likhne baiTho jo kabhi dil ki hikayat koi
naam us men mira tum hasb-e-rivayat likhna
pankhuḌi phuul ki lab aankh hai gahra sagar
abru hain tegh se aur chaal qayamat likhna
bhulne vaale agar yaad kabhi aa ja.un
bhigi palkon se faqat ashk-e-nadamat likhna
vaise aḳhlaq ki do chaar kitaben paḌh kar
ham ko aata hi nahin harf-e-siyasat likhna
tire hathon ko jo malik ne qalam saunpa hai
jhuuT ko jhuuT sadaqat ko sadaqat likhna
tum jinhen kahte ho kafar unhen aa kar dekho
kaise karte hain ye insan ki ḳhidmat likhna
ai gham-e-ishq mire paanv ke chhale gin kar
dasht-e-ulfat ki ye majbur masafat likhna
yaad hai pahli mohabbat ki ḳhumari ab tak
vo daraḳhton pe tira naam ‘masarrat’ likhna
Leave a Reply