Asad Rizvi
kahin charaghon ko niind aa.e kahin pe rabt-e-hijab TuuTe
kisi ki ankhon ki jaage qismat kisi ka band-e-naqab TuuTe
tumhari ankhon ke samne hi hamari ankhon ka ḳhvab TuuTe
faza ki rangin titliyon ki nazar se shaḳh-e-gulab TuuTe
dayar-e-shab ke the sab musafir sukut-e-shab to sabhi ne toḌa
to muntaḳhab ik hami hon kaahe hami pe kyon ye azaab TuuTe
na kar jabin-e-ḳhiyam zaḳhmi na sah azabon ki dhuup sar pe
na kar havaon ki parvarish yuun ki zor-avar tanab TuuTe
vo jis ki miTTi men pal rahe the shagufe amn-o-aman ke logo
usi pe barsa lahu ka badal usi pe saare azaab TuuTe
‘asad’ ghaTa.en ye tirgi ki tabhi chhaTengi ki jab falak par
kisi ke mathe ka chand chamke kisi nazar ka shahab TuuTe
Leave a Reply