Zafar Zaidi
chand fiqre zer-e-lab taḌpa kiye
vo hamen aur ham unhen dekha kiye
gham tha apni bad-nasibi ka unhen
der tak kuchh lafz kal roya kiye
mere qadmon men rahi manzil miri
raste surat miri dekha kiye
gham bhi ik ne.amat hai lekin dosto
ham use paaya kiye khoya kiye
mujh se mil kar kal mire ahbab bhi
der tak kya jaane kya socha kiye
jis se rahti thi munavvar ye zamin
asman vo chand taare kya kiye
asmanon ki taraf chal di zamin
ham andhere ghaar men soya kiye
mil na paaya zindagi ka kuchh suragh
muddaten guzrin hamen pichha kiye
chal diya ik aur patta TuuT kar
andhiyon ke dosh par takiya kiye
koi bhi dharti na raas aa.i hamen
ham ḳhalaon men ‘zafar’ dekha kiye
Leave a Reply