ḳhair ka tujh ko yaqin hai aur us ko shar ka hai
donon haq par hain ki jhagḌa sirf pas-manzar ka hai
ansuon se tu hai ḳhali dard se aari huun main
teri ankhen kanch ki hain mera dil patthar ka hai
kaun dafnata use vo ik barahana laash thi
sab ne puchha kaun hai vo kaun se lashkar ka hai
tu sukun se thak gaya hai aur betabi se main
shauq hai tujh ko safar ka aur mujh ko ghar ka hai
ek pauda sehn men tha dhuup kha kar jal gaya
sirf mera hi nahin hai ranj ye ghar bhar ka hai
sochta rahta huun main teri uḌanen dekh kar
ye hava ka zor hai ya tere bal-o-par ka hai
ek buḌhe ne kiya asr-e-ravan pe tabsira
ye zamana aadmi ka hai ki zor-o-zar ka hai
main ne sincha hai lahu se is dil-e-sar-sabz ko
umr bhar se ye ilaqa meri chashm-e-tar ka hai
main simaT kar leTta huun bistar-e-idrak par
paanv phaila.un to andesha mujhe chadar ka hai
is masafat ka mudava tujh se bhi mumkin nahin
zaḳhm-e-dil se kuchh ziyada zaḳhm mere sar ka hai
ik tabib-e-admiyat ne kaha hai saaf saaf
zahr duniya ki ragon men sab fasad-e-zar ka hai
dekh kar insan ko kahti hai saari ka.enat
ye to ham men se nahin hai ye koi bahar ka hai
saari kaḌiyan toḌ diin main ne mohabbat ke siva
kaun toḌega ise ye jabr to andar ka hai
Leave a Reply