dil ki dhadkan ulajh rahi hai ye kaisi saughat ghazal ki
tar-e-nafas par ungli rakh di chhed ke tum ne baat ghazal ki
us ka chehra us ki ankhen ek qayamat haae mohabbat
tasviren khud batlati hain saari tafsilat ghazal ki
vahi kahani dohraenge vahi nishani phir dhundenge
aadam aur havva se judi hai asl men talmihat ghazal ki
safha-e-dil par misra-e-tar ki shakl men aansu girte hain
dard ke badal chhate hain to hoti hai barsat ghazal ki
hava hue vo din ki ghazal karti thi bas mahbub se baat
vaqt ka manzar-nama badla badli tarjihat ghazal ki
chulhe-chauke se be-zari fikr-e-sukhan aasab pe taari
jagte sote raah niharun ‘rakhshan’ main ban raat ghazal ki
Leave a Reply