abdur-rauf-urooj

Ba-Qadr-e-Did Na The Teri Anjuman Ke Charagh

ba-qadr-e-did na the teri anjuman ke charagh

miri nigah farozan hui hai ban ke charagh

hazar bad-e-havadis hazar sarsar-e-gham

jala raha huun magar azmat-e-chaman ke charagh

nuqush-e-shahr-e-nigaran ubharte hi rahe

mire junun ke ujale tiri lagan ke charagh

savad-e-asr men farda ki tabnaki hai

bujha diye gae andesha-e-kuhan ke charagh

hujum-e-gham men hua tha ye kaun naghma-sara

jali hai tirgi-e-sham dard ban ke charagh

na bad-e-dasht-o-bayaban na sham-e-ranj-o-bala

lahu se apne jalate hain ham-vatan ke charagh

jilau men tabish-e-qindil-e-agahi le kar

bujha diye hain mohabbat ne ahrman ke charagh

zamana sham-e-bala se saval karta hai

kidhar gae vo tire daur-e-pur-fitan ke charagh

sharar-e-nutq hua sarf-e-har-khayal ‘uruj’

jale to bujh na sake shokhi-e-sukhan ke charagh

More Poems

Leave a Comment