ik hamin silsila-e-shauq sambhale hue hain
vo to sab ahd-e-vafa hashr pe Taale hue hain
valvale dil ke sambhalte hi nahin siine men
jaane kis chand ke ye bahr uchhale hue hain
qariya-e-ḳhvab ki jis nuur nahaya hua hai
ham usi se ye shab o roz ujale hue hain
vaqt duniya men phirata hai dinon ko kya kya
dekh jo koh the vo ruui ke gaale hue hain
tu mile ya na mile jo ho muqaddar apna
kya ye kam hai ki tire chahne vaale hue hain
gundh kar Dhaal kisi surat-e-yakta.i men
jaan o tan qalb o nazar tere havale hue hain
Leave a Reply