har ek zehn men saara hisab rahta hai
saval sunne se pahle javab rahta hai
vo ek moḌ jahan ek din luTa tha main
vahin mira dil-e-ḳhana-ḳharab rahta hai
hava ke dam pe hai jab zindagi ka dar-o-madar
to kyuun ghurur tujhe ai habab rahta hai
chalegi chaal koi gardish-e-falak shayad
ka.i dinon se baḌa iztirab rahta hai
vo jholi kaise bhare pyaar karne valon ki
isi firaq men TuuTa shahab rahta hai
mire liye hain musibat ye a.ina-ḳhane
yahan zamir mira be-naqab rahta hai
hasin ḳhvab hon kitne hi par koi ‘alok’
tamam umr kahan mahv-e-ḳhvab rahta hai
Leave a Reply