Ishq Ka Dard-E-Be-Dawa Hai Ye

ishq ka dard-e-be-dava hai ye

jaane teri bala ki kya hai ye

maar Dalegi ek aalam ko

teri ai shokh gar ada hai ye

har dam aata hai aur hi saj se

kya hi allah mirza hai ye

chahiye us ka sharbat-e-didar

ki tap-e-ishq ki dava hai ye

us sitam-pesha mehr dushman ki

mere uupar agar jafa hai ye

is men us ki to kuchh nahin taqsir

chahne ki mire saza hai ye

dil-e-‘bedar’ ko to luut liya

zulf hai ya koi bala hai ye

Leave a Comment