Be-Waqt Jo Ghar Se Wo Masiha Nikal Aaya

be-vaqt jo ghar se vo masiha nikal aaya

ghabra ke mire munh se kaleja nikal aaya

madfun hua zer-e-zamin kya koi vahshi

kyuun ḳhaak se ghabra ke bagula nikal aaya

a.ine men munh dekh ke maghrur hue aap

do shaklon se kaisa ye natija nikal aaya

zaḳhmi jo kiya tum ne khule ishq ke asrar

jo kuchh ki mire dil men nihan tha nikal aaya

thukrane lage dil ko to barpa hue tufan

qatra jo hatane lage dariya nikal aaya

ab ruk nahin sakti hai ‘munir’ ah-e-jigar-soz

dam ghutne laga munh se kaleja nikal aaya

Leave a Comment