Zafar Zaidi
na phal na phuul na saaya shajar men baaqi hai
magar vo sukha hua peḌ ghar men baaqi hai
gire makan ko sadiyan guzar ga.iin lekin
par ab bhi ḳhauf sa divar-o-dar men baaqi hai
abhi hai der yahan inqalab aane men
baḌa sukut abhi shor-o-shar men baaqi hai
tum aana chaho palaT kar to aa bhi sakte ho
har ek naqsh-e-qadam rahguzar men baaqi hai
yahi bahut hai ki ham mahfilon men milte rahen
mohabbaton ka bharam to nazar men baaqi hai
na chahne men bhi ji chahta hai milne ko
kami si koi to ḳhair-o-ḳhabar men baaqi hai
abhi se himmat-e-parvaz tu na chhoḌ ‘zafar’
abhi to jaan tire bal-o-par men baaqi hai
Leave a Reply