Poet
ma.il-ba-karam mujh par ho jaa.en to achchha ho
maqbul mire sajde ho jaa.en to achchha ho
is dasht-navardi se pichha to kahin chhuTe
ham kucha-e-janan men mar jaa.en to achchha ho
sar ho dar-e-janan pe dam apna nikal jaa.e
ye kaam mohabbat men kar jaa.en to achchha ho
yuun to sabhi aa.e hain dafnane mujhe lekin
vo bhi miri mayyat pe aa jaa.en to achchha ho
phir dard-e-juda.i ka jhagḌa na rahe koi
ham naam tira le kar mar jaa.en to achchha ho
dekhen na kisi ko ham phir dekh ke ruḳh tera
didar tira kar ke mar jaa.en to achchha ho
rah jaa.e mohabbat ka duniya men bharam kuchh to
do phuul hi turbat pe dhar jaa.en to achchha ho
dhaḌka laga rahta hai har vaqt balaon ka
ham saath nasheman ke jal jaa.en to achchha ho
badnam hi karne ko aa.en vo magar aa.en
vo itna karam mujh par kar jaa.en to achchha ho
ja sakte hain jaane ko ham chal ke ‘fana’ dekhen
vo ḳhud hamen mahfil men bulva.en to achchha ho
Leave a Reply