Rashid Shahjahanpuri
dil ghamon ka maḳhzan hai hasraton ka maskan hai
phir bhi saya-e-ummid us men saya-afgan hai
kohnagi ke daman men dahr ka naya-pan hai
qasr hai jo madfan tha baagh tha vo jo ban hai
muḳhtasar agar kiije sharh-e-lafz ulfat ki
raat din ki uljhan hai umr bhar ki sulgan hai
ḳhun-e-dil se likkha hai mahzar-e-vafa dekho
kis qadar murassa hai kis qadar muzayyan hai
kam bisat parvana soz-e-ishq kya jaane
jal bujha vo ik lau par yaan mudam sulgan hai
shauq-e-dil hudi-ḳhvan hai karvan-e-masti men
kis ko fikr-e-rahbar hai kis ko ḳhauf-e-rahzan hai
apne ḳhush-nasibon ka haal bhi kabhi sun lo
maut munh churati hai zindagi ajiran hai
saari umr tarse hain us ke ik tabassum ko
kis qadar haya-parvar zindagi ki dulhan hai
ham ḳhulus ke bande ham vafa ke divane
ai ‘rashid’ kya janen dosti bhi ik fan hai
Leave a Reply