ghar se bahar kabhi nikla kiije
‘hashami’ galiyon men Tahla kiije
husn baton men bhi paida kiije
samne aa.ina rakkha kiije
kyuun kisi aur ko rusva kiije
ab ke apna hi tamasha kiij
pahle ḳhud aap ko parkha kiije
aur phir shikva-e-duniya kiije
kahin suuli na samjhe le koi
apni banhon ko na khola kiije
sochiye phuul khila hai kya kya
surat-e-sang na dekha kiije
itni fursat bhi kise hai lekin
gahe-gahe hamen puchha kiije
har koi munh men zaban rakhta hai
rokta kaun hai bola kiije
ye bhi andaz hai ik chhupne ka
is qadar paas na aaya kiije
aane lagti hai shikaston ki sada
aise ḳhamosh na baiTha kiije
rabt bhi rakhta hai ma.ani apne
baat be-bat na Toka kiije
‘hashami’ gham ne phir angḌa.i li
‘hashami’ phir ghazal insha kiije
Leave a Reply