haa.il dilon ki raah men kuchh to ana bhi hai
ghafil samajh raha hai vahi ba-vafa bhi hai
aadat buri hai gham men saharon ki dosto
tanha sulagte rahne ka apna maza bhi hai
ham ne baḌe hi pyaar se rishte saja.e the
ab tum kaho ki rishton men kya kuchh bacha bhi hai
ik rabt-e-mustaqil hai isi rahguzar ke saath
jis rahguzar pe qafla-e-dil luTa bhi hai
ham rahravan-e-shahr-e-tamanna ko kya pata
manzil rah-e-talab se kahan tak juda bhi hai
hai aa.ine men aks mira zahiri magar
batin men jhankiye ki vo mujh se juda bhi hai
mazlum-e-husn huun so na tanha samajh mujhe
jis ka nahin hai koi to us ka ḳhuda bhi hai
be-ḳhauf banTte raho zulmat men nuur tum
apni tapish se kya koi jugnu jala bhi hai
paḌhiye mujhe saliqe se phir sochiye janab
kya dard-e-mustaqil hai maraz la-dava bhi hai
‘zakir’ ye taj-o-taḳht hai mansub un ke naam
jin ke saron pe saya-e-bal-e-huma bhi hai
Leave a Reply