zarra-e-na-tapida ki ḳhvahish-e-aftab kya
naghma-e-na-shunida ka hausla-e-rabab kya
umr ka dil hai muzmahil ziist hai dard-e-mustaqil
aise nizam-e-dahr men vasvasa-e-azab kya
naghma ba-lab hain kiyariyan raqs men zarra-e-tapan
sun liya kisht-e-ḳhushk ne zamzama-e-sahab kya
chehra-e-shab damak uTha surḳh shafaq jhalak uThi
vaqt-e-tulu kah gaya jaane aftab kya
rindon se baz-purs ki pir-e-mughan se dil-lagi
aaj ye mohtasib ne bhi pi hai kahin sharab kya
sham.a thi laakh adh-jali bazm men raushni to thi
varna gham-e-nashat men raushni-e-gulab kya
ghair ki rah-guzar hai ye dost ki rah-guzar nahin
kaun uTha.ega tujhe dekh raha hai ḳhvab kya
muddaton se ḳhalish jo thi jaise vo kam si ho chali
aaj mire saval ka mil hi gaya javab kya
haan tiri manzil-e-murad duur bahut hi duur hai
phir bhi har ek moḌ par dil men ye iztirab kya
Leave a Reply