chalte hain gulshan-e-firdaus men ghar lete hain
tai ye manzil jo khuda chahe to kar lete hain
ishq kis vaste karte hain pari-zadon se
kis liye jaan par aafat ye bashar lete hain
dekhne bhi jo vo jaate hain kisi ghael ko
ik namak-dan men namak piis ke bhar lete hain
khaak ud jaati hai suthrav udhar hota hai
nimcha khench ke vo baag jidhar lete hain
main vo bimar huun allah se ja ke iisa
mire nuskhon ke liye hukm-e-asar lete hain
yaar ne luut liya mujh vatan-avara ko
log ghurbat men musafir ki khabar lete hain
is taraf hain ki jharoke men udhar baithe hain
jaeza kushton ka apne vo kidhar lete hain
thiik us rashk-e-chaman ko vo qaba hoti hai
naap kar jis ki rag-e-gul se kamar lete hain
kuchh thikana hai pari-zadon ki be-rahmi ka
ishq-bazon se qisas aath pahar lete hain
ye naya zulm hai ghussa jo unhen aata hai
be-gunahon ko bhi makhuz vo kar lete hain
shohrat us said-e-vafadar ki ud jaati hai
tiir men jis ke lagane ko vo par lete hain
kahte hain huron ke dil men tire kushton ke banav
is liye khuun men naha kar vo nikhar lete hain
kis qadar nama-o-paigham ko tarsaya hai
bhejte hain khabar apni na khabar lete hain
dam nikalte hain kalejon se lahu jaari hai
saans ulti tire taftida-jigar lete hain
chal khade honge to hasti main na phir thahrenge
jan-e-jan chand nafas dam ye bashar lete hain
hai ishara yahi mu-ha-e-mizha ka un ki
ham vo nashtar hain ki jo khun-e-jigar lete hain
samna karte hain jis vaqt gada ka tere
badshah takht-e-ravan par se utar lete hain
sikka-e-dagh-e-junun paas hain rahna hoshyar
log raste men ‘sharaf’ jeb katar lete hain
Leave a Reply