Makhmoor Jalandhari
jalva-farosh-e-ḳhas ka andaz-e-am dekh
har zarre ke vajud men us ka qayam dekh
aa.ega past tujh ko nazar phir har astan
sajdon men baiTh kar tu hasin ka maqam dekh
teri talash men hain mire saath sargiran
meri hayat-o-maut ka sauda-e-ḳham dekh
ho dekhna uruuj men shan-e-zaval agar
ye mehr-e-nim-roz ye mah-e-tamam dekh
‘maḳhmur’ agar samajh men na aa.e ma.al-e-zist
ba.ad numud-e-sub.h siyahi-e-sham dekh
Leave a Reply