Wo Wafur-E-Lala-O-Gul Nahin Wo Nashat-E-Qalb-O-Nazar Nahin

Poet

vo vafur-e-lala-o-gul nahin vo nashat-e-qalb-o-nazar nahin

jo iram-ba-kaf thi dam-e-sahar vo bahar-e-shaḳh-o-shajar nahin

ye zamana fursat-e-gham agar mujhe de to main bhi dikha sakun

ki tajalliyan mire shauq ki faqat ek raqs-e-sharar nahin

tiri yaad ba.is-e-rahat-e-tapish-e-ḳhayal to hai magar

main hujum-e-shauq ko kya karun mire bas men dida-e-tar nahin

ye raza-e-yar ka paas hai ki ye sazishen hain havas ki

mire dil men soz-e-fughan to hai mire lab pe ah-e-sahar nahin

mira shauq abla-pa sahi miri raah rah-e-fana sahi

jo tira ḳhayal ho rahbar to andheri raat ka Dar nahin

tu kamal-e-shauq se saaz uTha miri jaan taron ke giit ga

tiri bazm-gah-e-tarab men ab kisi dil-jale ka guzar nahin