Dasht-E-Wahshat Ko Phir Aabaad Karunga Ek Din

dasht-e-vahshat ko phir ābād karūñgā ik din

tū na hogā to tujhe yaad karūñgā ik din

apne hāthoñ se giraftār karūñgā ḳhud ko

ḳhud ko maiñ ḳhud se phir āzād karūñgā ik din

aa.ine se maiñ karūñgā tirī timsāl kashīd

phir tire aks ko ham-zād karūñgā ik din

merā dushman kaf-e-afsos malegā jānāñ

ḳhud ko is tarah se barbād karūñgā ik din

maiñ ye suntā huuñ ki ye kār-e-mohabbat hai savāb

maiñ bhī is kaam meñ imdād karūñgā ik din

apnī har baat pe tanqīd karūñgā ḳhud hī

apne hī aap pe īrād karūñgā ik din

bhuul kar bhī na bhulā pā.egī duniyā mujh ko

dekhnā vo suḳhan ījād karūñgā ik din

daad ḳhud deñge har ik sher pe ‘ġhālib’ mujh ko

‘mīr’-sāhib ko bhī ustād karūñgā ik din

Leave a Comment