Safdar Hamadani
jidhar bhi dekhen vahi ravayye munafiqon ke
samajh men dukh ham ko aa rahe hain payambaron ke
khuli hui hain jo khiḌkiyan vo bhi adh-khuli hain
na jaane kab se hain dar muqaffal yahan gharon ke
ana miri hai abhi bhi har maslahat pe haavi
lahu men utre hain tajribe sab masafaton ke
na-ashna hai har ek shaḳh-e-shajar samar se
daraḳht saare Dase hue hain ye barishon ke
ajab taghayyur-pasand us ki hui hai aadat
badalte rahte hain roz me.aar chahaton ke
ugi hai fasl-e-najat jaise ḳhizan men ‘safdar’
yuun sar-burida badan paḌe hain musafiron ke
Leave a Reply