Javed Akhtar
ba-zahir kya hai jo hasil nahin hai
magar ye to miri manzil nahin hai
ye tuuda ret ka hai beach dariya
ye bah ja.ega ye sahil nahin hai
bahut asan hai pahchan us ki
agar dukhta nahin to dil nahin hai
musafir vo ajab hai karvan men
ki jo hamrah hai shamil nahin hai
bas ik maqtul hi maqtul kab hai
bas ik qatil hi to qatil nahin hai
kabhi to raat ko tum raat kah do
ye kaam itna bhi ab mushkil nahin hai
Leave a Reply