Ghulam Husain Sajid
main us pari ka agar mudda.a nahin samjha
samajh men kya nahin aaya main kya nahin samjha
yahi bahut hai ki is baar bhi main dushman ko
bura samajhte hue bhi bura nahin samjha
vo manta hai mire iḳhtilaf ke haq ko
use biThaya hai sar par ḳhuda nahin samjha
charagh-o-a.ina hairan kyuun nahin honge
ki main sabahat-e-gul ki ada nahin samjha
kisi bikharte hue ḳhvab ke ta.aqub men
nikal paḌa huun magar rasta nahin samjha
bahut se ranj sahe apni jaan par lekin
tire vajud ko ḳhud se juda nahin samjha
hazar main ne har ik chiiz ki vazahat ki
magar vo shaḳhs mira mas.ala nahin samjha
usi ne aag laga.i thi mere hathon ko
jise main bhuul se barg-e-hina nahin samjha
kisi ki uḌti hui niind ki haqiqat ko
nagar men koi bhi mere siva nahin samjha
khaḌa hua tha kahin bam-e-arsh par ‘sajid’
magar zamin ko tahtus-sura nahin samjha
Leave a Reply