log hain muntazir-e-nur-e-sahar muddat se
main bhi baiTha huun sar-e-rahguzar muddat se
muddaton dar-o-rasan ziist ka unvan rahe
morid-e-sang hain is shahr men sar muddat se
jis ki manzil ka nishan tak bhi nahin nazron men
kab se us raah men hain mahv-e-safar muddat se
vo koi dasht-o-bayaban ho ki abadi ho
ban chuke hain sabhi sho.alon ke nagar muddat se
reg-zaron men hai logon ko Thikanon ki talash
muntazir apne makinon ke hain ghar muddat se
pa-ba-zanjir hain imkan-e-riha.i to kuja
zang-alud hain zindanon ke dar muddat se
Leave a Reply