main na kahta tha mire bhaai nahin ho sakti
aag paani men shanasai nahin ho sakti
titliyan phuul parinde use lene aae
is se badh kar to pazirai nahin ho sakti
mere chehre pe ye mangi hui ankhen na laga
in men jo hai miri binai nahin ho sakti
ik kuaan hai so hai maalum mire bhaiyon ko
raste men to koi khaai nahin ho sakti
panting jan-e-musavvir ke bane hathon ki
dar-o-divar pe ye kaai nahin ho sakti
jag-hansai miri karva di zamane bhar men
tum to kahte the ki rusvai nahin ho sakti
aa gaya dasta ababilon ka ahmad-‘irfan’
ab hamen jang men paspai nahin ho sakti
Leave a Reply