Ahmad Javed
chaak karte hain gareban is faravani se ham
roz khilat paate hain darbar-e-uryani se ham
muntakhab karte hain maidan-e-shikast apne liye
khaak par girte hain lekin auj-e-sultani se ham
ham zamin-e-qatl-gah par chalte hain siine ke bal
jada-e-shamshir sar karte hain peshani se ham
haan miyan duniya ki cham-kham khuub hai apni jagah
ik zara ghabra gae hain dil ki virani se ham
zof hai had se ziyada lekin is ke bavajud
zindagi se haath utha sakte hain asani se ham
dil se bahar aaj tak ham ne qadam rakkha nahin
dekhne men zahira lagte hain sailani se ham
daulat-e-duniya kahan rakkhen jagah bhi ho kahin
bhar chuke hain apna ghar be-saz-o-samani se ham
zarra zarra jagmagati jalva-barani-e-dost
dekhte hain rauzan-e-divar hairani se ham
aql vaalo khair jaane do nahin samjhoge tum
jis jagah pahunche hain rah-e-chak-damani se ham
karobar-e-zindagi se ji churate hain sabhi
jaise durveshi se tum maslan jahanbani se ham
Leave a Reply