abrar-ahmad

Tujhse Wabastagi Rahegi Abhi

tujh se vabastagi rahegi abhi

dil ko ye bekali rahegi abhi

sar ko divar hi nahin milti

so ye divangi rahegi abhi

koi din fursat-e-tamanna hai

koi din sar khushi rahegi abhi

kasa-e-umr bhar chuka phir bhi

kahin koi kami rahegi abhi

shab vahi hai jamal-e-khvab vahi

aankh apni lagi rahegi abhi

jis qayamat ki aamad aamad hai

vo qayamat tali rahegi abhi

ham yaqinan yahan nahin honge

ghaliban zindagi rahegi abhi

kuchh abhi ranj-e-arzu hai hamen

aankh men kuchh nami rahegi abhi

tu abhi mubtala-e-duniya nahin

tujh men ye sadgi rahegi abhi

la-taalluq huun us taalluq se

aur ye dosti rahegi abhi

ji uchatta nahin hai lagta nahin

so ye beganagi rahegi abhi

kahin koi charagh jalta hai

kuchh na kuchh raushni rahegi abhi

More Poems

Leave a Comment