ḳhvab rangon se bani hai yaad taaza
dhuup likh laa.i mubarak yaad taaza
phir baha le ja.ega laava lahu ka
sang-dil par ghar ki rakh buniyad taaza
ab-e-taza ḳhanjar-e-ḳhamosh ko de
hai burida-lab pe ik fariyad taaza
be-sutuni phir uTha.e sang sar hai
chahti hai ju-e-ḳhun farhad taaza
be-charaghan bastiyon ko zindagi de
ik sitam aisa bhi kar ijad taaza
asman sar par bhi kya qaa.em nahin hai
kuchh to kah ai uqda-e-uftad taaza
aisi sangin chup ki dil phaTne laga hai
kuchh to ai sho.ala-nava irshad taaza
Leave a Reply