vo rangat tu ne ai gul-ru nikali
nichhavar ko gulon ne bu nikali
mizaj-e-bu-e-sumbul kar ke mauquf
saba nai nikhat-e-gesu nikali
na thi jaane ki us tak raah dil ki
chhuri se chiir ke pahlu nikali
nikasi jab na dekhi yaas dil ki
baha ke aath aath aansu nikali
hamari ruuh ik rashk-e-chaman ne
sungha ke phuul ki khushbu nikali
mire sayyad ne bulbul ki mayyat
qafas se tod ke baazu nikali
kiya us se jo khush-chashmi ka daava
tiri jaegi aankh aahu nikali
sulaimani dikha di shaan tum ne
pari-ru maang vo khush-ru nikali
nikala husn ka arman tu ne
miri hasrat na ai dil-ju nikali
chaman men bhini bhini bu ne un ki
na basne di gai shabbu nikali
dahan-e-zakhm se talvar chumi
ba-shakl-e-bosa-e-abru nikali
qayamat ka shabab us ne nikala
‘sharaf’ changez-khani khu nikali