Idhar Kuchh Din Se Dil Ki Bekali Kam Ho Gai Hai

Irfan Sattar

idhar kuchh din se dil ki bekali kam ho ga.i hai

tiri ḳhvahish abhi hai to sahi kam ho ga.i hai

nazar dhundla rahi hai ya manazir bujh rahe hain

andhera baḌh gaya ya raushni kam ho ga.i hai

tira hona to hai bas ek surat ka izafa

tire hone se kya teri kami kam ho ga.i hai

ḳhamoshi ko junun se dast-bardari na samjho

tajassus baḌh gaya hai sar-kashi kam ho ga.i hai

tira rabt apne gird-o-pesh se itna ziyada

to kya ḳhvabon se ab vabastagi kam ho ga.i hai

sar-e-taq-e-tamanna bujh ga.i hai sham-e-umid

udasi baḌh ga.i hai be-dili kam ho ga.i hai

sabhi zinda hain aur sab ki tarah main bhi huun zinda

magar jaise kahin se zindagi kam ho ga.i hai