Hakeem Nasir
ankhon ne haal kah diya honT na phir hila sake
dil men hazar zaḳhm the jo na unhen dikha sake
ghar men jo ik charagh tha tum ne use bujha diya
koi kabhi charagh ham ghar men na phir jala sake
shikva nahin hai arz hai mumkin agar ho aap se
diije mujh ko gham zarur dil jo mira uTha sake
vaqt qarib aa gaya haal ajiib ho gaya
aise men tera naam ham phir bhi na lab pe la sake
us ne bhula ke aap ko nazron se bhi gira diya
‘nasir’-e-ḳhasta-hal phir kyuun na use bhula sake
Leave a Reply