Asar Lakhnavi
jhapki zara jo aankh javani guzar ga.i
badli ki chhanv thi idhar aa.i udhar ga.i
mashshata-e-bahar ajab gul katar ga.i
munh-band jo kali thi khili aur sanvar ga.i
pesh-e-jamal-e-yar kiran aftab ki
sharma ke chahti thi ki palTe bikhar ga.i
mal ke bhabhut chehre pe taron ki chhanv ka
dhoni rama.e dar pe ye kis ke sahar ga.i
kya jaane aankh maar ke kya kah ga.i shafaq
phulon ki god mauj-e-nasim aa ke bhar ga.i
siine men aur taab de shole ko shauq ke
sajda ghalat agar na tajalli nikhar ga.i
teri hi jalva-zar hai duniya-e-rang-o-bu
ai vaa.e vo nazar jo hijabat par ga.i
ab haath malte hain ki dam-e-arz-e-majra
kahne ki baat dhyan se kaisi utar ga.i
kuchh din ki aur kashmakash-e-zist hai ‘asar’
achchhi buri guzarni thi jaisi guzar ga.i
Leave a Reply