Poet
jo sher tere ḳhat ki ibarat men kaam aa.e
vo hi musha.eron ki nizamat men kaam aa.e
laaya to tha main aur kisi kaam se magar
shayad ye phuul ab miri mayyat men kaam aa.e
vo aa gaya tha meri giraft-e-vafa men par
us par fareb the jo zamanat men kaam aa.e
phenki hai mere ghar men mire dost ne jo iinT
shayad vo mere ghar ki marammat men kaam aa.e
ashkon ki ja.edad to kar di ghazal ke naam
jo qahqahe bache the musibat men kaam aa.e
haan aise dost ki bhi zarurat nahin mujhe
jo sirf aur sirf zarurat men kaam aa.e
Leave a Reply