baaqi hai tab-e-zabt na taqat fughan ki hai
halat bahut saqim dil-e-na-tavan ki hai
ankhon men josh hai kabhi tufan nuuh ka
dil men mire taḌap kabhi barq-e-tapan ki hai
ai ah-e-na-rasa tire naale hain be-asar
behtar yahi hai baat rahe jo jahan ki hai
hota hai josh gar ye jo ab baat baat par
dil men mire ye choT ilahi kahan ki hai
ai dil tujhe natija-e-ulfat hai ḳhuub yaad
aur phir bhi aarzu tujhe ku-e-butan ki hai
jis ko samajh rahe hain vo badal ki ik garaj
fariyad dardnak kisi ḳhasta-jan ki hai
bulbul hai ḳhush ki baagh men hai ḳhaak ashiyan
ye kaun janta hai ki miTTi kahan ki hai
sone diya na shor-e-qayamat ne qabr men
samjha tha main ki jaa.e ye amn-o-aman ki hai
rang-e-shafaq se shaam ko milta hai ye pata
ab asman pe gard mire karvan ki hai
mansur ki fana hai baqa-e-sada-e-haq
avaz vadiyon men abhi tak azaan ki hai
samjha raha huun dil ko nahin phir bhi e’timad
vo baat kah raha huun jo un ki zaban ki hai
hai dil-gudaz yuun bhi miri dastan-e-gham
tasir us pe kuchh mire tarz-e-bayan ki hai
‘hafiz’ ye ka.enat na ho jaa.e jal ke ḳhaak
baḌhti hui tapish mire soz-e-nihan ki hai
Leave a Reply