Hisar-E-Dil Se Udhar Bhi Haqiqaten Hain Bahut

Arsh Siddiqui

hisar-e-dil se udhar bhi haqiqaten hain bahut

tire baghair bhi jiine ki suraten hain hain

tire ghurur ko ham se shikayaten hain baja

ham aadmi hain hamen past adaten hain bahut

jo teri tarz-e-jafa se hamara haal hua

zaban pe laa.en ye us men qabahaten hain bahut

agar hai ba.is-e-vahshat tujhe hamara junun

hamen bhi teri ada se shikayaten hain bahut

ghalat ki milne men hai fasle ka ḳhauf tujhe

ki aj-kal to safar men sahulaten hain bahut

mujhe to chhoḌ gaya raah men to Thiik hua

ki pa-shikasta tha main aur masafaten hain bahut

zaban khol ke is bazm men ḳharab hue

saval ek tha lekin vazahaten hain bahut

kise sunen to karen kis se ham gurez ki yaan

har ik zaban pe ghamon ki hikayaten hain bahut

hamen azab-e-qayamat ka koi ḳhauf nahin

ki is se baḌh ke jahan men qayamaten hain bahut

mile ye log to kyuun aur log kyuun na mile

javab koi nahin hai bujharten hain bahut

nahin hai aaj ki tanha.iyon se haul hamen

ki dil pe naqsh javani ki suraten hain bahut

kis ehtiyat se ai ‘arsh’ us ko sarf karen

mata-e-umr hai kam aur chahaten hain bahut