Sufi

Guzre Jidhar Se Nur Bikhere Chale Gae

guzre jidhar se nuur bikhere chale gae

vo ham-safar hue to andhere chale gae

ab main huun aur shiddat-e-gham ki hai tez dhuup

un gesuon ke saae ghanere chale gae

mere tafakkurat ko dasti rahi thi jo

nagin chali gai vo sapere chale gae

ummid ke shajar pe vo halchal nahin rahi

chiḌiyan gaiin to rain basere chale gae

andhe safar ko ghar se main nikla tha dosto

aai jab un ki yaad andhere chale gae

atish ne mere ghar ko jalaya to kya hua

kuchh der ke liye to andhere chale gae

‘hasrat’ main be-qarar huun luTne ke vaste

jaane kahan hasin luTere chale gae

More Poems

Leave a Comment