ajiib tarz-e-takallum se aazma ke mujhe
vo chahta hai abhi dekhna jhuka ke mujhe
main der se hi sahi ghar pahunch gaya aḳhir
vo mutma.in tha naya rasta dikha ke mujhe
ik umr main ne jise ghaur se nahin dekha
rakha usi ne kaḌi dhuup se bacha ke mujhe
main aa.ina huun ye us ko ḳhabar na thi shayad
vo sharmsar hua raushni men la ke mujhe
kabhi jahan pe hazaron charagh jalte the
mila sukun vahan ik diya jala ke mujhe
surur-e-sahn-e-chaman se sukut-e-dasht-e-talab
kahan se la.in hava.en kahan uḌa ke mujhe
Leave a Reply