zauq-e-nazzara liye ham bhi ḳhabar tak aa.e
shab ke pahlu se uThe aur sahar tak aa.e
bu-e-gul bad-e-saba raqs-e-sharar tak aa.e
rang hona tha hamen ḳhun-e-jigar tak aa.e
abr-e-rahmat hai to shabnam ki tarah se utre
rang-e-ḳhushbu ki hava arz-e-hunar tak aa.e
is se pahle hi baras jaata hai ik abr-e-karam
paanv ki dhuul uThe aur mire sar tak aa.e
kyuun pareshan hai tu ai mire gum-karda-e-rah
raah dushvar hai lekin mire ghar tak aa.e
pesh-ḳhema tha yahi fat.h-o-zafar ka shayad
zer hote hue lashkar jo zabar tak aa.e
Leave a Reply