ankhon se haya tapke hai andaz to dekho
hai bul-havason par bhi sitam naaz to dekho
us but ke liye main havas-e-hur se guzra
is ishq-e-khush-anjam ka aghaz to dekho
chashmak miri vahshat pe hai kya hazrat-e-naseh
tarz-e-nigah-e-chashm-e-fusun-saz to dekho
arbab-e-havas haar ke bhi jaan pe khele
kam-talai-e-ashiq-e-jan-baz to dekho
majlis men mire zikr ke aate hi uthe vo
badnami-e-ushshaq ka eazaz to dekho
mahfil men tum aghyar ko duz-dida nazar se
manzur hai pinhan na rahe raaz to dekho
us ghairat-e-nahid ki har taan hai dipak
shoala sa lapak jaae hai avaz to dekho
den paki-e-daman ki gavahi mire aansu
us yusuf-e-bedard ka eajaz to dekho
jannat men bhi ‘momin’ na mila haae buton se
jaur-e-ajal-e-tafraqa-pardaz to dekho