bane-banae hue raston pe ja nikle
ye ham-safar mire kitne gurez-pa nikle
chale the aur kisi raste ki dhun men magar
ham ittifaq se teri gali men aa nikle
gham-e-firaq men kuchh der ro hi lene do
bukhar kuchh to dil-e-be-qarar ka nikle
nasihaten hamen karte hain tark-e-ulfat ki
ye khair-khvah hamare kidhar se aa nikle
ye khamushi to rag-o-pai men rach gai ‘nasir’
vo naala kar ki dil-e-sang se sada nikle
Leave a Reply