Insha Allah Khan Insha
hai jis men qufl-e-khana-e-khummar todiye
yaani dar-e-bahisht ko yakbar todiye
kyuun qaid-e-khum men dukhtar-e-raz hi padi rahe
ye mohr-e-resman-e-sarokar todiye
shagird amir-hamza-e-sahib-qiran ke hain
kyunkar bhala na qila-e-ashrar todiye
kiije laqa-e-bakhtar-e-be-baqa ko qaid
najtak ke sar pe gurz-e-garan-bar todiye
choti pakad ke nargis-e-jadu ki khinchiye
kalle ko us ke mariye lalkar todiye
rustam se chhin lijiye dev-e-safed ko
aur is ki dah marod ke talvar todiye
sadd-e-sikandari bhi jo chadh jaae dhyan to
vohin tufail-e-haidar-e-karrar todiye
aa javen haft-khvan-e-tilismat samne
to khair se unhen bhi ba-takrar todiye
hisn-e-zamurradain-e-adu koh-e-qaf par
hove to us ko bhej ke ayyar todiye
zambil hai amar ki dil-e-fikr-khez ye
is ko kisi tarah se na zinhar todiye
hai azm-jazm ye ki zabardasti aaj to
band-e-qaba hai mausam-e-gulzar todiye
ya chhedne ko abr ke ik jhatka maar kar
shalvar-band barq-e-sharar-bar todiye
ji chahta hai le ke balaen tumhari aaj
poren in ungliyon ko sab ai yaar todiye
‘insha’ dikha ke aur bhi ik jalva-e-ghazal
band-e-naqab-e-shahid-e-asrar todiye
Leave a Reply