qurbaten hote hue bhi faslon men qaid hain
kitni azadi se ham apni hadon men qaid hain
kaun si ankhon men mere khvab raushan hain abhi
kis ki ninden hain jo mere ratjagon men qaid hain
shahr abadi se khali ho gae khushbu se phuul
aur kitni khvahishen hain jo dilon men qaid hain
paanv men rishton ki zanjiren hain dil men khauf ki
aisa lagta hai ki ham apne gharon men qaid hain
ye zamin yunhi sikudti jaegi aur ek din
phail jaenge jo tufan sahilon men qaid hain
is jazire par azal se khaak udti hai hava
manzilon ke bhed phir bhi raston men qaid hain
kaun ye patal se ubhra kinare par ‘salim’
sar-phiri maujen abhi tak daeron men qaid hain