poet

Farhad Kis Ummid Pe Lata Hai Ju-E-Shir

farhad kis ummid pe laata hai ju-e-shir

vaan khuun ki havas hai nahin arzu-e-shir

hai us javan ki baat men ab to lahu ki baas

ve din gae ki aati thi us munh se bu-e-shir

hote hi subh aah gaya mah-e-char-dah

sabit hua mujhe ki namak hai adu-e-shir

hasrat hi dil men kohkan akhir ye le gaya

shirin ne apni ankhon bhi dekha na ru-e-shir

us duudh ka khuda kare kaasa hamen nasib

jannat men panj-tan ki jo bahti hai ju-e-shir

ashiq hain apne khun-e-jigar-khvar zahr-nosh

raghbat taraf shakar ke hai un ko na su-e-shir

jin ko baghair sai vo shirin-dahan mile

kho den na koh vo na karen justuju-e-shir

milte hi us se dil ki girah mere khul gai

uqde shakar ke jaise khulen ru-ba-ru-e-shir

phir duudh ki budhape men aave na munh se baas

akhir kahan talak ye ‘bayan’ guftugu-e-shir

More Poems

Leave a Comment