Dard-E-Dil Paida Karen Ya Dard-E-Sar Paida Karen

Poet

dard-e-dil paida karen ya dard-e-sar paida karen

meri baten jaane un par kya asar paida karen

zindagi un ki hai jo gulshan men apne vaste

ashiyan ba-vasf-e-sad-barq-o-sharar paida karen

aa.iye ham rahbar-o-rahzan se ho kar be-niyaz

manzil-e-maqsud tak ḳhud rahguzar paida karen

aa ki phir de kar payam-e-nau mazaq-e-did ko

har nazar men ek duniya-e-digar paida karen

khul hi ja.egi haqiqat alam-e-azdad ki

dida-e-dil imtiyaz-e-ḳhair-o-shar paida karen

un ko pa kar ḳhud ko kho dena to hai ik aam baat

un ko pa kar ḳhud ko paane ka hunar paida karen

ah-e-be-tasir men ‘talib’ asar aa ja.ega

dard-e-dil paida karen dard-e-jigar paida karen