dil muzmahil hai un ke ḳhayalon ke bavajud
ik sail-e-tirgi hai ujalon ke bavajud
allah ri arifana-tajahul ki shoḳhiyan
samjhe na mera haal misalon ke bavajud
badla na chashm-e-shauq ka koi bhi zaviya
bigḌe hue zamane ki chalon ke bavajud
varaftagi-e-shauq ajab taziyana thi
baḌhna paḌa hai paanv ko chhalon ke bavajud
un ki vafa pe aaj bhi iman hai mira
ai vahm tere sad.ha savalon ke bavajud
ye kaun sa maqam hai ai zo.am-e-agahi
kuchh sujhta nahin hai ujalon ke bavajud
kam ho saka na martaba-e-be-ḳhudi-e-shauq
aql-o-ḳhirad ke sad.ha kamalon ke bavajud
ishq ik ḳhayal-e-ḳham hai un ke ḳhayal men
‘qadir’ ke aise chahne valon ke bavajud
Leave a Reply