be-sabab vo na mire qatl ki tadbir men tha
us ke hathon hi se miTna miri taqdir men tha
muntazir tha tira divana-e-gesu jis raat
alam-e-chashm har ik halqa-e-zanjir men tha
jumbish-e-lab ka guman hota tha ashiq ko tire
is qadar lutf-e-ḳhamoshi tiri tasvir men tha
o kaman-abru jo ik tiir lagaya to kya
ishtiyaq is se zyada dil-e-naḳhchir men tha
murgh-e-bismil sa taḌapta tha har ik murgh-e-sahar
asar-e-tir mire nala-e-shab-gir men tha
Leave a Reply