Khalid Shirazi
har naqsh hava ho ke bikhar ja.ega aḳhir
‘ḳhalid’ tira ehsas bhi mar ja.ega aḳhir
miT ja.ega ḳhvahish ka nishan maut ke hathon
ye saanp bhi siine se utar ja.ega aḳhir
din jis ke liye raat baḌe karb men kaaTi
sayon ke ta.aqub men guzar ja.ega aḳhir
main ḳhauf huun baiTha huun kamin-gah-e-fana men
tu bach ke miri zad se kidhar ja.ega aḳhir
jo saa.e ke manind ravan hai mire hamrah
vo shaḳhs bhi tanha mujhe kar ja.ega aḳhir
Leave a Reply