Poet
tu hi insaf se kah jis ka khafa yaar rahe
apne jiine se na kis tarah vo be-zar rahe
zakhm-e-dil chhile kabhi aur kabhi zakhm-e-jigar
nakhun-e-dast-e-junun kab mire be-kar rahe
in jafaon ka maza tum ko chakha devenge
haan agar zinda ham ai charkh-e-jafakar rahe
mai-kade men hai badi ye hi mughan ki piiri
ki bas us chashm-e-siyah-mast se hushyar rahe
jalte bhunte rahe ham bazm-e-butan men lekin
shama saan us pe bhi sar dene ko tayyar rahe
yuun to kya khvab men bhi yaar ka milna malum
apne gar aah yahi tala-e-bedar rahe
ek ja siine men un donon ka rahna hai muhal
ya ye dil hi rahe ya ah-e-sharar-bar rahe
us se dil khaak ho ummid-e-husul-e-matlab
jis se ik bose pe sau tarah ki takrar rahe
le ke paikan se tire tiir bata to qatil
khuun men duube nahin kab ta lab-e-sofar rahe
jins-e-dil atish-e-ulfat men jale jo chahe
par kisi tarah tiri garmi-e-bazar rahe
bazi-e-ishq men chipke raho kya khaak kahen
ek dil rakhte the paas apne so baar rahe
aisa dam naak men aaya hai ki ham raazi hain
‘aish’ gar siine men is dil ke evaz khaar rahe
Leave a Reply