ḳhaksari kijiye ya shahryari kijiye
ham gharibon men kuchh apna faiz jaari kijiye
jin se kuchh hasil nahin tabir-ḳhvahi ke siva
aise ḳhvabon men basar kyuun raat saari kijiye
jo hamara haal hai us se alag un ka nahin
sakinan-e-shahr se kya parda-dari kijiye
aap jo kahte hain vo karte nahin malum hai
pyaar kar sakte nahin baten to pyari kijiye
aa.en bhi tashrif le aa.en yahi dastur hai
baiTh kar mere sirhane gham-gusari kijiye
chuum kar ham chhoḌ denge ye guman sachcha nahin
aap apni chaah ka patthar na bhari kijiye
ham yuun hi mar ja.enge kaafi hai ishara aap ka
aankh ko ḳhanjar na abru ko kaTari kijiye
kusht-gan-e-ḳhanjar taslim kahlate hain kyuun
kuchh taḌap dikhla.iye kuchh be-qarari kijiye
ham bure hain ya bhale mahsus ḳhud ko bhi na ho
thoḌi apne aap se bhi hoshyari kijiye
sarkashan-e-ishq phir amada-e-fariyad hain
phir koi farman-e-qatl-e-am jaari kijiye
Leave a Reply